हरेक वर्ष मार्च ३१ तारिखमा पारलिङ्गी दृश्यताको अन्तर्राष्ट्रिय दिवस मनाइने गरिन्छ । यस दिवसको सुरुवात संयुक्त राष्ट्र अमेरिकाकी एक पारलिङ्गी महिला रचेल क्रनडलद्वारा सन् २००९ मा गरेका थिए । पारलिङ्गी जनसंख्याको दृश्यता र नेतृत्व पछाडी परेको हुनाले यस दिवसले पारलिङ्गी दृश्यता बढाएर सामाजिक स्वीकार्यता र अधिकार स्थापनालाई तीव्रता दिनका निम्ति यस दिवसको सुरुवात भएको हो । नेपालमा पहिलो पटक सन् २०१९ मा फिब्वःख्यः ( माइतीघर मण्डला ) मा भेला भई यो दिवस मनाइएको थियो ।
आफ्नो जैविक लिङ्गसँग मेल नखाने लैङ्गिक पहिचान भएका व्यक्तिहरूलाई जनाउन प्रयोग गरिने शब्द 'पारलिङ्गी' हो । कुनै पनि व्यक्ति जसको जैविक लिङ्ग स्त्रीलिङ्गी र लैङ्गिक पहिचान पुरुष हो भने ऊ पारलिङ्गी पुरुष ( transgender man / transman ) र कुनै पनि व्यक्ति जसको जैविक लिङ्ग पुलिङ्गी र लैङ्गिक पहिचान महिला हो भने ऊ पारलिङ्गी महिला ( transgender woman / transwoman ) भनिन्छ । पारलिङ्गी हुनु एक लैङ्गिक पहिचान हो र यसको सम्बन्ध उसको यौन अभिमुखिकरणसँग छैन, अर्थात् पारलिङ्गी जनसंख्यालाई को तर्फ यौन आकर्षण हुन्छ भन्ने विषय पनि विविध हुन्छ । पारलिङ्गी व्यक्तिहरू विषमयौनिक ( हेट्रोसेक्सुअल ), समयौनिक (होमोसेक्सुअल), द्वयौनिक (बाइसेक्सुअल), सर्वयौनिक (प्यानसेक्सुअल), अयौनिक (एसेक्सुअल), इत्यादी यौन अभिमुखिकरणका हुन सक्छन् । पारलिङ्गी जनसंख्या तेस्रोलिङ्गी वा गैर-द्वयसांखिक (नन्-बाइनेरी) भन्दा फरक विषय हो । पारलिङ्गी व्यक्तिहरू आफूलाई महिला र पुरुष भन्दा फरक भनी पहिचान गर्दैनन् ।
Liked by:
