चैत्र शुक्ल तृतीयाका दिन गौरी पूजा गरिन्छ । विवााहित स्त्रीहरु र कुमारीहरु दुवै अखण्ड सौभाग्यवती हुने चाहना राख्दै व्रत बस्ने गर्छन् । यो व्रतलाई गणगौर व्रत पनि भनिन्छ । अनि गौरी तृतीया, सौभाग्य गौरी व्रत अनि गौरी पूजा पनि भन्ने चलन छ ।
खेतमा बालीहरु लगभग काटिइसकेको अवस्था छ, गहुँका बालाहरु काटेर बाली भित्राइसकिएको अवस्था छ । नयाँ वर्षका शुरुवाती दिनहरु, खुल्ला आकाश अनि लामो लामो साँझहरुले लामो दिनको झल्को दिइरहेका छन् ।
सामन्यतया चैत्र महिनाको सक्रान्तिका दिनदेखि यस व्रतको शुरुवात हुने र आजका दिन यसको समापन गरिने चलन रहन्छ । पक्षका हिसाबले हेर्दा चैत्र कृष्ण पक्षको शुरुवातदेखि शुक्ल पक्षको तृतीयासम्म गरेर १८ दिन अवधिको व्रतका रुपमा यो व्रतलाई मानिन्छ ।
शिवपुराणमा चाहिँ माता पार्वतीले ५ दिनसम्म व्रत लिएको हुँदा भगवान शिव पाउन सफल भएको भनी उल्लेख गरिएको छ । यद्यपि यस व्रत पार्वती र शिव दुवैका लागि उत्तिकै महत्वपूर्ण छ । पति र पत्नी दुवैले आउँदा वर्षहरुसम्म एकअर्कालाई साथ दिँदै अघि बढ्ने र सम्मान गर्ने आशय बोकेको यस व्रतको सबैलाई शुभकामना ।
अर्को हिसाबले यस व्रतलाई आउँदै गरेको मनसुनको स्वागतका रुपमा पनि लिन सकिन्छ । पानी बोक्न गएका बादलहरुले यथेष्ट पानी अनि चिस्यानहरु लिएर आऊन् । सबैको मनकामना पूरा होस्, शुभकामना ।
हाम्रो पात्रोका लागि सुयोग ढकाल
Liked by:
