सामाजिक सञ्जालमा उत्तिकै स्वादिलो प्रतिक्रिया पाइरहेको फिल्मलाई हेर्ने दर्शकले निर्देशकको कामसँगै कलाकारको अभिनय पनि रुचाएका छन् । ग्ल्यामरस भूमिकामा देखिँदै आएकी स्वस्तिमा खड्काले विवाहित महिलाको भूमिका जीवन्तताका साथ निर्वाह गरेको दर्शक टिप्पणी छ भने चोपेन्द्र बनेका मुकुन भुषाललाई पनि दर्शकले औधी रुचाएका छन् ।
शुक्रबारबाट प्रदर्शनमा आएको फिल्म बुलबुलले दर्शक र समीक्षकबाट राम्रो प्रतिक्रिया पाएको छ । फिल्म हेरेपछि दर्शकले सामाजिक सञ्जालमा फिल्मको खुलेर तारिफ गरेका छन् भने समीक्षकले फिल्म मौलिक फिल्मको बहसमा कोसेढुंगाको रुपमा रहने भन्दै फिल्मको प्रशंसामा प्रशस्त शब्द खर्चिएका छन् ।
फिल्म समीक्षक गोकर्ण गौतमले फिल्म बुलबुल रैथाने स्वादको बताउँदै फिल्मलाई ५ मा ४ रेटिङ दिएका छन् । बुलन्द बुलबुल शीर्षकको समीक्षामा गौतमले आफ्नोपनको आभाष दिलाउने फिल्म नेपालमा विरलै बन्ने जिकिर गर्दै बुलबुलले त्यो कमी पूरा गरेको उल्लेख गरेका छन् । निर्देशक विनोद पौडेलको प्रशंसा गर्दै गौतमले नेपाल साप्ताहिकको समीक्षामा लेखेका छन् , ‘अहिलेका तमाम निर्देशकझैँ बजार होइन, फिल्मको कलात्मक मान्यताप्रति उत्तरदायी भएर पौडेलले आफूलाई अलग र अब्बल सावित गरेका छन् । हाम्रै परिवेशको कथा भन्ने उनको प्रयास धेरैहदसम्म सार्थक छ । कलाकारको अभिनयदेखि प्राविधिक पक्षसम्म निर्देशकको लगाम साँच्चै लोभलाग्दो छ । बासी मसलेदार फिल्मबाट दिक्दार दर्शकलाई बुलबुलले राहत दिनेछ । रैथाने स्वाद रुचाउनेले त छुटाउने कुरै भएन । यसले मौलिक दृश्य–भाषा निर्माणमा एउटा दरिलो इँटा थप्नेमा सन्देह छैन ।’
अनलाइन खबरको समीक्षामा शिव मुखियाले पनि फिल्मभित्र निर्देशकको शिल्पको तारिफ गरेका छन् । नारी उत्पीडनको अव्यक्त कथा शीर्षकमा मुखिया भन्छन्, ‘हरेक दृश्य, अझ भनौं हरेक शटमा निर्देशकको रचनाशिल्प कसरी पोतिन्छ ? घतलाग्दो जवाफ छ, बुलबुलसँग । विनोद पौडेल निर्दे्शित फिल्ममा कथाको दस्तावेज छैन, उपदेश छैन, आर्दश छैन, सन्देश छैन, तर्क छैन । अव्यक्त कथा छ, अदृश्य पीडा छ । र, त्यसलाई पोख्ने रहरलाग्दो ‘सिनेम्याटिक’ भाषा छ ।’
सामाजिक सञ्जालमा उत्तिकै स्वादिलो प्रतिक्रिया पाइरहेको फिल्मलाई हेर्ने दर्शकले निर्देशकको कामसँगै कलाकारको अभिनय पनि रुचाएका छन् । ग्ल्यामरस भूमिकामा देखिँदै आएकी स्वस्तिमा खड्काले विवाहित महिलाको भूमिका जीवन्तताका साथ निर्वाह गरेको दर्शक टिप्पणी छ भने चोपेन्द्र बनेका मुकुन भुषाललाई पनि दर्शकले औधी रुचाएका छन् । परम्परागत कथ्य शैलीलाई चुनौती दिँदै तयार भएको फिल्मलाई अर्का समीक्षक विष्णु शर्माले क्लासरुम सिनेमाको रुपमा चित्रित गरेका छन् ।
‘हलि–हलि र मुलधारे फिल्मको स्वादबाट मुक्त हुनुहुन्छ र धैर्यशील हुनुहुन्छ भने ‘बुलबुल’ तपाईंका लागि हो । तर, थ्री–एक्ट संरचना तपाईंको सिनेम्याटिक लिट्रेसी हो भने बुलबुललाई ‘वाहियात’ भन्दै गाली गर्ने स्वतन्त्रता तपाईसँग छ । त्यो गाली निर्देशकीय अभिव्यक्तिको सफलता हो । युरोपेली न्यारेटिभ स्ट्रक्चरबाट प्रभावित ‘बुलबुल’लाई कथ्य शैली र प्रस्तुतिकरणको एउटा बुकमार्क मान्न सकिन्छ । समग्रमा यो क्लास रुम सिनेमा हो,’ बुलबुल क्लास रुम सिनेमा शीर्षकको समीक्षामा बिष्णु शर्माले लेखेका छन् ।
शुक्रबारबाट करिब ७० हलबाट प्रदर्शन थालेको बुलबुलले दर्शकबाट अपेक्षित साथ पाएको छ । पानी र विदेशी फिल्मसँगको चर्को प्रतिस्पर्धाका बावजुद शुक्रबार करिब ५० प्रतिशत र शनिबार ९० प्रतिशत दर्शकको साथ पाएको निर्माण टिमको दाबी छ ।
Liked by:
