सन् २०१४ मा उच्च शिक्षा अध्ययनका लागि अमेरिका पुगेका नेपाली छोरा दिवेश पोखरेलले संसारकै उत्कृष्ट गायन रियालिटी शो मानिने “अमेरिकन आइडल”को उपविजेता बनेर इतिहास रचेका छन् । आइडलको यो १८औं संस्करणमा दिवेश पोखरेल फाइनलमा पुग्ने पहिलो नेपाली हुन् । यो एउटा ऐतिहासिक उपलब्धि हो। भोटिंग मार्फत दिवेश पोखरेललाई थोरै पछी पार्दै प्रतियोगिताको उपाधि भने जस्ट सामले जितिन् ।
उत्कृष्ट स्वर र गायन शैली भएका नेपाली दिवेश पोखरेल त्यहाँ “आर्थर गन” नामले चर्चित भए । काठमाडौंमा जन्मे-हुर्केको पोखरेल अमेरिकन आइडलको अडिसन राउण्ड पार भएपछी नै नेपालमा उनको बारेमा थुप्रै चर्चा हुन थालेको थियो । उनलाई अमेरिकन आइडलको उपाधि विजेता बनाउँने सोचमा थुप्रै नेपालीहरुले भोटिंग र भोटको लागि आफ्नो सामाजिक सञ्जालमा अपिल समेत गरिरहेका थिए । दिवेशलाई अमेरिका पुगेपछी सङ्गीत प्रति रुची झन् बढेको महसुस भयो र त्यसपछि विगत २ वर्ष देखि उनि सङ्गीत मै समर्पित हुन थालेका उनले शो मा बताए।
दिवेशसँगै डिल्लोन जेम्स, जस्ट साम, जोन्नी वेस्ट, फ्रान्सिस्को मार्टिन टप ५ मा पुगेका थिए । कोभिड–१९ को महामारीका कारण यसवर्षको आइडलको फाइनलमा सबैले आ–आफ्नो घरबाटै प्रस्तुति दिएका थिए । अन्तिम प्रस्तुतिमा दिवेशले “आई डन्ट वान्ट टु बी” बोलको गीत गाए । अडिसन राउण्डबाट नै तिनै जना जजको प्रशंशा पाएका दिवेशले बिस्तारै आफ्नो गायनको खुबी प्रस्तुत गरेर विश्वभर नै धेरैको मन जिते ।
दिवेश पोखरेललाई हाम्रो पात्रो परिवारको शुभकामना, भविष्यमा आफ्नो उत्कृष्ट गायनको जादूले देश विदेशमा थप सफलता मिलोस्, शुभकामना ।
Liked by:
